ABŞ Yeni Təqaüd Sisteminin Hazırlanmasında Azərbaycana Dəstək Olmaq üçün Qrant Ayırır
Səfir Dersi və Dövlət Sosial Müdafiə Fondunun Sədri Müslimov Azərbaycanın təqaüd sistemində həyata keçirilən islahatlara dəstək olmaq məqsədilə ABŞ-ın Ticarət və İnkişaf Agentliyindən 600,000 ABŞ dolları məbləğində vəsaitin ayrılması üçün qrant sazişi imzalamışlar. Bu qrant çərçivəsində göstəriləcək texniki dəstək Azərbaycana onun enerji gəlirlərindən istifadə edərək fərdi təqaüd hesabları üçün mexanizmin hazırlanması və həmçinin, fərdi şəkildə sığortalanmış, dövlət tərəfindən maliyyələşdirilən təqaüd hesablarının açılması və maliyyələşdirilməsinə kömək olacaqdır. Bu saziş Azərbaycanın öz enerji gəlirlərindən effektli şəkildə və Azərbaycan vətəndaşlarının mənafeyi üçün istifadə etməyə yardım etmək və həvəsləndirmək üçün tərtib olunmuş ABŞ-ın geniş dəstək səylərinin sübutudur. İmzalanma mərasimi kütləvi informasiya vasitələrində geniş və müsbət işıqlandırılmışdır.
Səfirin Qətlə Yetirilmiş Jurnalistin Məzarını Ziyarət Etməsi ABŞ-ın Mediya Azadlığına Dəstəyinin Təzahürüdür
ABŞ-ın Azərbaycanda müstəqil jurnalistlərə və mediya azadlığına dəstəyini və həmrəyliyini ifadə etmək üçün səfir Dersi üç il bundan əvvəl qətlə yetirilmiş, həqiqəti çatdırmaqdan çəkinməyən jurnalist Elmar Hüseynovun məzarını ziyarət etmişdir. Fürsətdən istifadə edərək Səfir Dersi cinayət işinin diqqətlə araşdırılması və cinayətkarların mühakimə olunması və cəzalandırılması üzrə ABŞ-ın çağırışını bir daha dilə gətirmişdir. ABŞ səfirliyi həmçinin Demokratiya, İnsan Hüquqları və Əmək Bürosundan Elmar Hüseynovun xatirəsinin əziz tutulması məqsədilə tədqiqat jurnalistikasına dəstək olmaq üçün Elmar Hüseynov Fonduna ayrılmış qrantı idarə edir. Elmar Hüseynovun vəfatının ildönümünün qeyd olunmasına məşhur media işçiləri və siyasətçilər qatılmışlar. Səfirin iştirakı və onun qeydləri ölkə mətbuatı tərəfindən geniş şəkildə əhatə olunmuşdur.
Senator Braunbək Münasibətləri Dərinləşdirmək və Genişləndirmək üçün ABŞ və Azərbaycanı “Böyük Sövdələşmə” üzrə Razılığa Gəlməyə Çağırır
Senator Braunbək Fevralın 20-də Azərbaycana səfər edərək Prezident Əliyevlə görüşmüş və Azərbaycanın Diplomatiya Akademiyasında toplaşmış 200-dən artıq Azərbaycanlı tələbə, dövlət rəsmisi və siyasətçinin qarşısında çıxış etmişdir. Öz çıxışında və Sual-Cavab hissəsində Senator Prezident Əliyevə Vaşinqtona səfər etməyə və enerji, ticarət və təhlükəsizlik/müdafiə əməkdaşlığı sahəsində ikitərəfli əlaqələri genişləndirmək üçün “böyük sövdələşmə” üzrə razılığa gəlməyə çağırdığını söyləmişdir. Senator Braunbək həmçinin ABŞ-da seçkilər, İran, Kosovo, PKK, Dağlıq Qarabağ və digər məsələləri müzakirə etmişdir. Senator həmçinin Xarici Dillər Universitetində bizim Amerika Mərkəzini ziyarət etmiş və ANS TV, Azadlıq Radiosu və BBC-yə ekskluziv müsahibə vermişdir.
